امبارح ،
كان ضروري جداً اكتشف ان مفيش شيء في الكون ممكن يستدعي اسفي عليه
بالشكل اللي يخليني اغير وجهة طريقي للأبد
بس ، عشان مش احس بإني في فترة حداد على شخص كان جوايا

وكوني شعرت في فترة معينة اني مش قابلة التجدد والتعمق

في حياة مليانه بشوية فرح
ده مش معناه اني محتاجه لوجود شخص يكون قريب !

* محتاجة ألبس قناع ، بس مش قناع عشان اتخبى لأ
عشان اتحسد !
اتحسد على اني ورا علبة الوان كبيره ، او علبة طباشير بيضا
تخلي وشي محتاج يموت اكتر عشان يقدر يتأقلم ومش يكون بين البينيين !

او اعمل زي المهرج ،
اتنطط واجري واضحك واعمل كل شيء ممتع في الحياه ،

واخفي تجاعيدي اللي تحت عيوني وتجارب أسفي على تجاوزات من ارواح كانو بيعنولي " حياه "
وألون صوابعي ، واحط ستاير كبيره بيني وبين القدر ،
وأطير .. وأطير .. وأطير ..

* نفسي اسمع فيروز ، واعيش قصتها مع القهوه ، ومع المفرق
وادندنها براحتي ، في مكان زي الفضا
محدش لا يفكر انا بسمعها دلوقتي ليه ، ولا حد يتقاسم لذتها معايا
انا وناسها ، وحبايبها ووداعها وبس


مش عايزه أجبر نفسي على التعري قدامي .. لمجرد اني انا الوحيده اللي شايفه نفسي
عايزه اخجل من نفسي .. وابصلها وانا جوايا حياء مني ليا
عايزاها مش توريني الندوب الكتير دي اللي انا الوحيده المضطره اعيشها

* نفسي لما اصاحب واحده طيبه ، اقولها اني بحبها بجد من غير ما تطلع
مني بعد تقل عميق جوايا مش بيبان الا ليا
وكل يوم اعرفها قد ايه هي مميزه ، واحكيلها عنها ، وعن خرافتها في التعامل معايا
من غير ما تلاحظ


نفسي دموعي متنزلش على كل شيء مش يستاهلها مني ،
ومش اتعذر !
بحكم التعليقات المخيفه ، والظنون الجارحة ، والغباء اللي جوايا اللي بيكوّن من كل كلمة حكاية


ومش امتنع عن الوش الرمادي ، اللي بيظهر وقت الغضب
من كل عين سمحت لنفسها انها تخترق خصوصياتي المحرمه ،

* نفسي اروح المغرب .. واشوف اهلي بقى
واشوف فرشة شعرها ، وكتبها بتاعت المدرسه
واشوف بالصدفه واحد كانت بتحبه أيام الابتدائيه ، واكلمه
ويلاقي روحها فيا ، ويعرف اني بنتها !


* نفسي مش اخاف من " موته "
ومش اعيط كل مره اتخيل فيها فراقه ، وادعي " ربي يحفظه ليا سالم يارب "
واضحك كده واروحله في اوضته واناديه بأحب الاسماء ليا ، واقوله تعالا نقوم نصلي مع بعض !
معأني واثقه ان دي اول امنيه هتمناها لو يومي مكنش قبل يومه !
قولوا يارب يكون قبله !


* نفسي مش احس بعبورهم السريع جوايا ، واللي بيخلق فيا انات كتير بتكبرني
وهما محطمين ، وعريانيين من كل ذنوبهم وفاكرين انهم خافينها


حتى خيانات قلمي ، بتحرقني
والحروف اللي بتتلكك عشان تكتب الغياب والألم والغرق والإنتظار في كل شيء موجود اصلاً جمبي
ومعايا !
حتى الفراغات البسيطه اللي بتعتليني ، وبتشق ذاكرتي لأسماء عمري ما عرفتها
واللي بتتكئ على انحرافات عمري ما تجاوزتها !


* نفسي اروح ماكدونالدز .. واكون انا وهي بس
ونفضل نتنطط طول اليوم ، وناكل كتير اوي ونلعب لحد ما نتبهدل
وواحنا ماشيين نشتري اكبر مصاصه في الكون ،
ومش نخاف ليخلص اليوم ويجي بكره ومش نكون هنا


* نفسي اكون مجنونه ، واحس اني رقيقه اوي كده
واتكلم ومحدش يفهم ، ويقولوا عليا مجنونه
وازعق واضحك في نفس الثانيه ، ويقولوا عليا مجنونه
واسخر واشد شعر اللي جمبي ، ويقولو عليا مجنونه
او اروح مدينة العاب ضخمه اوي .. وامسك الاطفال والعب بيهم
واكلمهم .. واحاول اخطفهم .. ويدخلوني مستشفى المجانين واقابل المجانيين
ويقولوا عليا مجنونه
حتى المجانيين نفسهم .. نفسي يقولوا عليا مجنونه !


* نفسي اكل ايس كريم دلوقتي حالاً
بيسعدني لما اكون مخنوقه ، طعم البروده اللي فيه بتقويني كل مابتنزل لتحت
ولما احس بيها في معدتي .. بتملاني
بحسها حاضره معايا ، ومش بتخليني فراغ ،

* نفسي كل الناس اللي انا بعنيلها في الحياه ومش قادره أكون بالقرب الكافي منهم
اني الاقيلهم قلوب غير قلبي ، قريب اكتر
وقادر يحضن بشكل اعمق ، ومش يتحسروا على بعد المسافات
وان الدنيا كفيله اوي انها تبعد عيونا عن بعضها !


* نفسي اروح مكتبه ، واجيب كرسي ليا من غير ضجه ولا حتى نفس
واجيب كتاب لشخص لسه مش اشتهر ، ويشدني اوي
واتحمس لقلمه اوي .. لدرجة تخليني
ادور على عنوان ليه .. او رقم تليفون
وابعتله رساله ، خاصه جداً
تحسسه انه روائي عظيم .. لا اتخلق ولا هيتخلق زيه !


* نفسي اشوفهم كده زي مخاليق ربنا ،
مش اخاف لحد غريب يشوفنا ويروح يفتن !
ومش استنى ليوم نحدده عشان نتقابل
مفيش عرف في الدنيا بيقول .. ان الأخ لازم يخاف لما يشوف أخوه !

* نفسي مروحش لبنان لـ نفس السبب
عايزه اروح عشان لبنان ! ، مش عشان اي سبب تاني


* نفسي دلوقتي حالاً ابعت لكل اسم مر على عيني
ابعتله " انت بخير " ؟
ولما اصحى الصبح الاقي رسايل من الدنيا كلها ..
ومش مهم يسألوا عن اسمي ، ولا على شخصي ولا على مين اكون انا اصلا !
المهم انهم عايشيين ، والايد اللي ردت عليا هي ايدهم
والعيون اللي شافت اشتياقي لاسمهم المخفي في حروفي ، هي عيونهم !



* نفسي مش اتخبى ورا ضلوعي ، واتعلم بقى ان الفتافيت مش بتصنع حياه
وان الغباء مش دايماً عذر لأخطائي ، واني كبرت
ده فات من عمري كتير اوي !
وانا لسه بصغرني ،
وانا لسه بقول ده بكره احسن ، وبعده احسن ، وبعد مليون سنه هيكون احسن

* نفسي مش أكون ساذجة ولا طيبة ..

ومش بس أفكر في المعنى الكويس في الكلمة ..

وأحاول أطلع بقى من المحيط اللي كنت عايشه فيه عشان أقدر أكمل صح !



نفسي امبارح مكونش عشته خالص
ومقولش اني اتعلمت ان مفيش حاجه في الكون لازم نأسف عليها

للأسف !